Það sem gerst hefur síðasta árið, eða svo

Jæja þá ætti nú að vera kominn tími á nýja bloggfærslu. Það er helst að frétta að við erum flutt frá Kaupmannahöfn og búum nú í Fjólugötu á Akureyri. Við keyptum hér íbúð sem er búin að vera í eigu fjölskyldunnar síðan 1944. Núna er Snæbjörn orðinn 15 ára, Tómas 13 ára, Lára 8 ára, Ásta 4 ára (bráðum 5) og Anna 2 ára. Helga fékk vinnu hér á Akureyri sem sálfræðingur hjá bænum og ég er í vinnu hjá skipulagsdeildinni. Ásta Hlín og Anna Bergdís eru mjög ánægðar í nýja leikskólanum sínum. Hann heitir Iðavöllur og er hérna rétt hjá okkur á Oddeyrinni. Ég lét hér fylgja með mynd sem var tekin af Ástu Hlín og vinum hennar á leikskólanum nú fyrir stuttu.

Fyrsta afmælisgjöfin

Myndband sem við tókum í dag þegar Anna Bergdís fékk pakka frá Óla afa, fyrsta afmælispakkann sinn.

Tómas orðinn 12 ára!

-
Jæja þá er Tómas minn orðinn 12 ára gamall. Hann hélt upp á afmælið á Hvammstanga en hann og Snæbjörn fóru héðan frá okkur þann 4. júlí síðast liðinn.

Hér er ein sólskinsmynd tekin fyrir nokkrum dögum í sandkassanum hjá okkur og sýnir bræðurna stolta yfir að hafa grafið Önnu hálfa í kaf. Snæbjörn Helgi, Anna Bergdís og afmælisbarnið, Tómas Bergsteinn.

Annars er allt gott að frétta. Það er búið að vera mjög heitt og rakt hér í Kaupmannahöfn síðustu daga, en við fjárfestum nýverið í viftu þannig að við kvíðum ekki komandi hitabylgjum. Til hamingju með daginn Tómas minn, hlökkum til að sjá þig aftur sem allra fyrst.

-

Systkinin á Íslandsbryggju

-

Það er búið að vera mjög gaman hjá okkur síðustu vikurnar hér í Kaupmannahöfn. Margir góðir gestir, vinir og ættingjar hafa komið í heimsókn til okkar og dvalið í nokkra daga. Fyrir viku síðan komu svo Snæbjörn og Tómas og það hefur verið mikið stuð hjá systkinunum.

Lára Huld, Ásta Hlín, Snæbjörn Helgi, Anna Bergdís og Tómas Bergsteinn í blíðviðri á Íslandsbryggju.

-

Sumarið er núna loksins komið hér hjá okkur eftir ískaldan vetur og svalt vor, en veðurspáin er all svakaleg næstu daga og er spáð um 30 stiga hita á föstudaginn! Nú er bara að kaupa nóg af sólarvörn og íspinnum.

_
-

Mótorhjólakappar í heimsókn

-

Við fengum þessa mótorhjólakappa í heimsókn til okkar í dag. Þetta eru þau Hrafnhildur systir og Manni, en þau eru á ferð um Evrópu með Ástu og Dóra, vinum sínum frá Íslandi.

Hrafnhildur systir og Manni að gera sig tilbúin til brottfarar í rigningu og roki.

-

Þau komu til okkar laust eftir hádegi og voru þá búin að keyra frá Óðinsvé í rigningu alla leið. Það ku vera fátt leiðinlegra fyrir mótorhjólaakstur en rigningarsuddi og því vonum við sannarlega að þau fái betra veður næstu dagana, hvert sem leið þeirra liggur um lendur Evrópu.

-

Myndbrot frá maí

Nokkur myndbrot frá mánuðinum sem nú er á enda

-

Snjór

Tók þetta myndband af stúlkunum í dag.

-